الشيخ محمد بن راشد آل مكتوم
تطفى شموع وشمعة الحب تولع
أنـــــا حبيبي يشبه الظبي الاتلَـــــع ........ له نظـرةٍ في حبـة القلـــب صايبه
من نظرته مخطرعلى الروح تطلع ........ وهوه دواها وعوقها مــــن سبايبه
يا خفــــــــق قلبي يـــــوم قَفّا وودّع ........ خفق اشقرٍ ومعيد صيــــده كسايبه
خطرٍ على كـــل العــــراوي اتقطّع ........ جــزعٍ رمـــوعٍ في هواه وطلايبه
ويا لج وجـــدان الغريم المـــــــولّع ........ ويا حــرّة الدمعه على الموق ذايبه
تطفي شموع وشمعة الحبّ تولــــع ........ والشمس تطفي نورها وهي غايبه
قبل الهوى عيني عصيّه ما تـــدمع ........ واليوم دمع العيــــن تجري سكايبه
ناح الحمام ولـــو لنوحي تسمّــــــع ........ وأنا أردّد من نشيــــــــدي عجايبه
وان ناح بأشعاري إذا ناح يسجـــع ........ بأصواته ألحانــــي تـغنّي رعــايبه
لي صاحبٍ حسنه غريبٍ منــــوّع ........ ما تدرك الوصّــاف كثـــرة غرايبه
متجددٍ والعيـــــن منه مــا تشبــــع ........ مهما تملّت في محاســــــــن هدايبه
يا خشف ريمٍ في الخلا القفر يرتع ........ يرعى الكـفـــايف خاليٍ في عشايبه
يذيّره ضِلّـه حـــــذورٍ مــــــــروَّع ........ في مثـله القنّيــــص منـــــواه خايبه
سراب وصلك مورد العذب يخدع ........ وانــــــا الظّما أسقانيه مـــن شرايبه
ما شفت طيرٍ طــــار إلا ووقّـــــع ........ لو هو بلــــــغ عند ارتفاعه سحايبه
أيّام حلــــوه مرّت ليتها لو بترجع ........ تحيا بها نفـــسٍ من الشّـــــوق ذايبه
الإثنين مايو 31, 2010 10:44 am
